محکمہ ان لینڈ ریوینیو کے ساؤتھ زون نے مالی سال 2025-26کی پہلی سہ ماہی کاٹیکس ریوینیو ٹارگٹ مشکلات کے باوجود بطریق احسن پورا کر لیا۔ دیئے گئے ٹارگٹ سے مبلغ 2ارب روپے کی ریکارڈ بیشی۔ ترجمان محکمہ ان لینڈ ریوینیو کی جانب سے جاری کردہ پریس ریلیز کے مطابق محکمہ ان لینڈ ریوینیو کے ساؤتھ زون کا رواں مالی سال کی پہلی سہ ماہی یعنی کہ ستمبر کوارٹر کا ٹارگٹ مبلغ 10ارب 50کروڑروپے تھا جس کے مقابلے میں ساؤتھ زون نے ماہ ستمبر کے اختتام پرمبلغ 2ارب روپے کی بیشی کے ساتھ کل مبلغ 12ارب 50کروڑ روپے کا ٹیکس ریوینیو اکٹھا کیا جو کہ سالانہ ریوینیو ٹارگٹ کا 18%بنتا ہے۔ اسطرح ساؤتھ زون نے ٹارگٹ سے 3%کی بیشی حاصل کرتے ہوئے مبلغ 2ارب روپے زائد وصول کئے جو کہ نمایاں اضافہ ہے۔
ترجمان کے مطابق ٹیکس گوشوارہ جات برائے ٹیکس سال 2025ء فائل کرنے کیلئے مورخہ 30ستمبر 2025ء مقرر تھی اور گوشوارہ جات کے ساتھ ٹیکس کی اچھی خاصی رقوم داخل خزانہ کی جاتی ہیں۔ مورخہ 28ستمبر سے نیٹ و موبائل سروس معطل ہونے کی بناء پر ٹیکس گزاران کی بڑی تعداد 30ستمبر تک ٹیکس گوشوارہ جات فائل نہ کر سکی اور نتیجتاً ٹیکس رقوم بھی جمع نہ ہوئیں لیکن ان حالات کے باوجود ساؤتھ زون نے موثر حکمت عملی اور تگ و دو کو یقینی بناتے ہوئے نا صرف ستمبر سہ ماہی کا ٹیکس ٹارگٹ عبور کیا بلکہ مبلغ 2ارب روپے کی بیشی کے ساتھ کل مبلغ 12ارب روپے سے زائد کا ٹیکس ریوینیو وصول کیا جو کہ ساؤتھ زون کی شاندارکارکردگی اور انتھک محنت کا منہ بولتا ثبوت ہے۔
مالی سال 2025-2026ء کی پہلی سہ ماہی کے اختتام پر ٹارگٹ کی کامیابی سے تکمیل پر چیئرمین آزاد جموں و کشمیر سنٹرل بورڈ آف ریوینیو /سیکرٹری ان لینڈ ریوینیو محمد رقیب خان نے ساؤتھ زون کی کارکردگی کو سراہا اوررواں مالی سال کی پہلی سہ ماہی کی طرح سالانہ ریوینیو ٹارگٹس کو کامیابی سے عبور کرنے کیلئے تمام تر کوششیں بروئے کار لانے کیلئے ہدایات جاری کیں۔
کمشنر ان لینڈ ریویونیو ساؤتھ زون سید انصر علی نے اظہار کیا ہے کہ ساؤتھ زون نے رواں مالی سال کے بقیہ کوارٹرز میں زیادہ سے زیادہ ٹیکس وصولی کو یقینی بنانے کیلئے حکمت عملی مرتب کر لی ہے اور چندخاص سیکٹرز پر توجہ مرکوز کی جا رہی ہے اور امید واثق ہے کہ مختلف شدید نوعیت کی مشکلات کے باوجود مالی سال 2025-2026کیلئے دیئے گئے ریوینیو ٹارگٹس کوحاصل کرنے کی حتی الامکان سعی کی جائے گی۔
